(香港佐敦)---(河馬仔專欄)佐敦添記法式三文治評論

當然今次講三文治好多人都會唔明點解如此普通之食物都要講,但如果講到此食物在港之歷史其實絕對唔失禮,好可能比漢堡包更早在港紮根.當然現在漢堡包賣到成行成市,在香港要找法式三文治可謂少之又少,此店好可能係全港碩果僅存的一兩間,坐落於佐敦舊區渡船角文苑街之添記.



小弟到此店可以算係"三顧草蘆"啦,連續兩次去到都冇人在店內,到到第三次才有得試.

店內唔大,只可容納幾個人坐下,當然店內都有唔少的越南土產賣.牆上亦貼了大量與此店相關的報導,連一些海外的飲食機構都有對此店有所嘉許等等.亦係2008年TIMEOUT HONGKONG 50佳的餐廳之一.



當然法式三文治有傳來自越南,因曾受法國統治,越南食品都有受法國不少影響.法式三文治係用法式麵包烘脆後,加上一些紅蘿蔔,青瓜絲,醃好之豬肉,肉末,鹹豬手肉等等.

香港出現之法式三文治相傳係上世紀七八十年代之越南難民來港時傳入的,但亦有人講係一些越南華僑當時傳入的,其實已經無從稽考.而此店亦有接近三四十年歷史,見證住快速變化之香港,可算是歷史之印證.

當日見到此店之店主,雖然店內冇其他食客,但店主都好熱心服務.當然小法包已經夠小弟吃啦,加一個越南炸春卷及一杯咖啡.


來了一杯幾蚊雞的咖啡,店東非常誠實,直接同我講係用咖啡粉沖的,叫我唔好誤會.當然我都會明白的,低飲落其實都唔差的,係甜了少少而己.


接住係來一包越南炸春卷,用紙袋包住食能給食客一種八十年代之感覺.雖然乾身,但入面頗滾熱辣,有少少肉絲,外脆內熱,如點雞醬應該可當佐酒小食.



當然要講講主角小法包,店內有個大焗爐,店主把法國長麵包焗到脆,接住便拿出加入上述所講之配料,再加上胡椒粉作調味.隨即送到我手上.

一咬入口,香脆即時係我諗到的字,麵包係要用大焗爐焗才是最好的.真的內外皆焗透,這是有功力才做得到的.麵包內之胡椒粉幾刺激,旨在增加包內肉食之層次感.而各類肉食好特別,尤其是豬手肉,小小脂肪帶來之軟糯感確係配合得非常好.而紅蘿蔔及青瓜絲帶出爽口及清新感,真係比坊間之漢堡包更有特色.亦見得出店主對製作法式三文治之努力,手藝及敬業精神.

是次看板娘---馬場樂子-對添記法式三文治之評分:


此類有歷史之食店在香港已經買少見少,當然世界所有事都係會推陳出新,亦唔可能事事保留,但希望小弟能在這個世代,寫下此篇來為香港現有的食物作一個紀錄.

...

瀏覽完整內容，請先 註冊 或 登入會員